മാഹി തിരുനാള് നാളെ സമാപിക്കും
മാഹി: സെന്റ് തെരേസാ ദേവാലയത്തില് വിശുദ്ധ അമ്മ ത്രേസ്യ പുണ്യവതിയുടെ തിരുനാള് ആഘോഷം നാളെ സമാപിക്കും. തിരുനാളിലെ അവസാന ഞായറാഴ്ചയായ ഇന്നലെ വിശ്വാസികളുടെ വലിയ തിരക്കാണ് അനുഭവപ്പെട്ടത്. ദേവാലയത്തിനകത്തും പുറത്തും തിരുസ്വരൂപത്തില് പൂമാല അര്പ്പിക്കുവാന് തീര്ഥാടകരുടെ നീണ്ട നിരയുണ്ടായി. ഇന്ന് വൈകുന്നേരം മംഗലാപുരം ബിഷപ് ഡോ. പീറ്റര് പോള് സല്ദാനയുടെ കാര്മികത്വത്തില് കൊങ്കിണി ഭാഷയില് ദിവ്യബലി അര്പ്പിക്കും. സമാപന ദിവസമായ നാളെ രാവിലെ 10.30ന് കണ്ണൂര് ബിഷപ് ഡോ.അലക്സ് വടക്കുംതലയ്ക്ക് സ്വീകരണം നല്കും. ഇടവക വികാരി റവ. ഡോ. ജെറോം ചിങ്ങന്തറ, സഹവികാരിമാര്, തിരുനാള് ആഘോഷ കമ്മിറ്റി ഭാരവാഹികള് എന്നിവര് ചേര്ന്ന് സെമിത്തേരി റോഡ് ജംഗ്ഷനില് ബിഷപ്പിനെ സ്വീകരിക്കും. തുടര്ന്ന് ബിഷപ്പിന്റെ കാര്മികത്വത്തില് ദിവ്യബലി അര്പ്പിക്കും.
ഉച്ചകഴിഞ്ഞുള്ള പ്രദക്ഷിണത്തിനു ശേഷം പൊതു വണക്കത്തിനായി പ്രതിഷ്ഠിച്ച അമ്മ ത്രേസ്യ പുണ്യവതിയുടെ തിരുസ്വരൂപം ഇടവക വികാരി റവ. ഡോ. ജെറോം ചിങ്ങന്തറ അള്ത്താരയിലെ രഹസ്യ അറയിലേക്ക് മാറ്റുന്നതോടെ ഈ വര്ഷത്തെ 18 ദിവസം നീണ്ടു നിന്ന തിരുനാള് ആഘോഷത്തിന് സമാപനമാകും.
0 Comments