പാനൂര്: പാനൂര് നഗരം ഇനി പൂര്ണമായും കാമറക്കണ്ണില്. പൗരപ്രമുഖരുടെയും വ്യാപാരികളുടെയും പ്രവാസി വ്യാപാരികളുടെയും സാമ്ബത്തിക സഹകരണത്തോടെ നഗരത്തിലും പരിസര പ്രദേശങ്ങളിലുമായി 60 കാമറകള് സ്ഥാപിക്കും. പാനൂരിലും പ്രധാന കേന്ദ്രങ്ങളിലും സദാസമയം പോലീസിന്റെ സാന്നിധ്യം ഉറപ്പുവരുത്തുകയെന്ന ലക്ഷ്യത്തോടെയാണ് സിസിടിവി കാമറകള് വ്യാപിക്കുന്നത്.നേരത്തെ സ്ഥാപിച്ച കാമറകള് തകരാറിലായതിനെ തുടര്ന്നാണ് നടപടി. പ്രവൃത്തി ഉദ്ഘാടനം പാനൂര് ബസ്സ്റ്റാന്ഡില് പാനൂര് നഗരസഭാ ഉപാധ്യക്ഷ കെ.വി.റംല നിര്വഹിച്ചു. പ്രവാസി വ്യവസായി ചിറ്റുള്ളി യൂസഫ് ഹാജിയില് നിന്നും ആദ്യഫണ്ട് പാനൂര് സിഐ ടി.പി.ശ്രീജിത്ത് ഏറ്റുവാങ്ങി. ഫോക്കസ് പാനൂര് പദ്ധതിയുടെ ഭാഗമായാണ് കാമറകള് സ്ഥാപിക്കുന്നത്. പാനൂര് ടൗണില് നിന്ന് വൈദ്യര്പീടിക വഴി പാലത്തായി വരെയും ചമ്ബാട് റോഡില് കെഎസ്ഇബി ഓഫീസ് വരെയും കൂത്തുപറമ്ബ് റോഡില് ഗുരുസന്നിധിവരെയും പൂക്കോം റോഡില് ഗവ.ആശുപത്രി ജംഗ്ഷന് വരെയുമാണ് കാമറകള് സ്ഥാപിക്കുക. ഒരു മാസത്തിനകം ജോലികള് പൂര്ത്തിയാക്കും.
20 എണ്ണം ബിഒടി അടിസ്ഥാനത്തിലും പഴയ ആറു കാമറകള് റിപ്പയര് ചെയ്തും ബാക്കി 34 എണ്ണം പൊതുഫണ്ട് ഉപയോഗിച്ചുമാണ് ഒരുക്കുന്നത്. ഇതോടൊപ്പം ബസ് സ്റ്റാന്ഡില് സ്ത്രീസുരക്ഷയുടെ ഭാഗമായുള്ള കോളിംഗ് ബെല്ലിന്റെ ഉദ്ഘാടനം പാനൂര് എസ്ഐ കെ.സന്തോഷ് നിര്വ്വഹിച്ചു. കെഎംസിസി അല്ബിദായ ഒമാന് യൂണിറ്റിന്റെ സഹായത്തോടെയാണ് കോളിംഗ് ബെല് സ്ഥാപിച്ചത്. സതേണ് ഇലക്ട്രിക്കല് ആന്ഡ് സെക്യുരിറ്റി സിസ്റ്റവുമായി സഹകരിച്ചാണ് സംവിധാനം ഒരുക്കിയത്. ബസ്സ്റ്റാന്ഡില് ഒറ്റപ്പെട്ടുപോകുന്ന സ്ത്രീകള്ക്ക് പോലീസിന്റെ സേവനം ആവശ്യമാണെങ്കില് സിസ്റ്റത്തിലെ റെഡ് ബട്ടന് അമര്ത്തി സ്പീക്കര് ഫോണിലൂടെ പോലീസുമായി സംസാരിച്ച് സേവനം ഉപയോഗപ്പെടുത്താം. കൗണ്സിലര് കെ.കെ.സുധീര് കുമാര്, മുന് പഞ്ചായത്ത് പ്രസിഡന്റ് ടി.ടി.രാജന്, പി.പി.എ.സലാം, നാണാറത്ത് അലി, ടി.അബൂബക്കര്, പി.കെ.ഷാഹുല് ഹമീദ്, കെ.കെ.ധനജ്ഞയന് , കെ.വി.അബ്ദുറഹ്മാന്, പി.കെ.മൂസ, ഒ.ടി.നവാസ് എന്നിവര് പങ്കെടുത്തു.
0 Comments