ആദ്യ വിമാനയാത്രികര് അതേ റൂട്ടില് വീണ്ടും പറക്കുന്നു
കണ്ണൂര്: കണ്ണൂര് വിമാനത്താവളത്തില്നിന്നുള്ള ആദ്യ വിമാനത്തില് യാത്രചെയ്തവര് വിമാനത്താവളത്തിന്റെ ഒന്നാം വാര്ഷികദിനത്തില് അതേ റൂട്ടില് വീണ്ടും പറക്കുന്നു. കണ്ണൂര് രാജ്യാന്തര വിമാനത്താവളത്തിലേക്കു സര്വീസ് നടത്താന് വിദേശ വിമാനങ്ങള്ക്ക് അനുമതി നല്കണമെന്ന ആവശ്യത്തിനായി വേറിട്ട രീതിയില് ശബ്ദമുയര്ത്താന് കൂടിയാണ് ഈ യാത്ര.
ആദ്യയാത്ര നടത്തിയവരുടെ വാട്സ്ആപ്പ് കൂട്ടായ്മയായ 'ഹിസ്റ്റോറിക്കല് ഫ്ലൈറ്റ് ജേര്ണി' യുടെ നേതൃത്വത്തിലാണു പരിപാടി. ഒന്നാം വാര്ഷികദിനത്തിലെ പ്രതിഷേധപ്പറക്കലില് അബുദാബിയില്നിന്ന് കണ്ണൂരിലെത്തിയ ആദ്യ വിമാനത്തിലെ യാത്രക്കാരും പങ്കാളികളാകും. കണ്ണൂരില് വിദേശവിമാനങ്ങള്ക്ക് അനുമതി നല്കണമെന്ന് ആവശ്യപ്പെടുന്ന ബാഡ്ജ് ധരിച്ചായിരിക്കും ഇവര് ഒന്പതിന് വീണ്ടും അബുദാബിയിലേക്കു പറക്കുക. മന്ത്രി കെ.കെ. ശൈലജ വിമാനം ഫ്ലാഗ് ഓഫ് ചെയ്യും.
യാത്രയോടനുബന്ധിച്ച് കണ്ണൂരിലും ദുബായിലും അനുബന്ധ പരിപാടികളും 'ഹിസ്റ്റോറിക്കല് ഫ്ലൈറ്റ് ജേര്ണി' ഗ്രൂപ്പിന്റെ നേതൃത്വത്തില് സംഘടിപ്പിച്ചിട്ടുണ്ട്.
കണ്ണൂരിലും ദുബായിലും കണ്ണൂര് വിമാനത്താവളവും അനുബന്ധ വികസനവുമായി ബന്ധപ്പെട്ട ചര്ച്ച നടക്കും. നാളെ വൈകുന്നേരം അഞ്ചുമുതല് കണ്ണൂര് മാസ്കോട്ട് പാരഡൈസില് നടക്കുന്ന സെമിനാറില് മന്ത്രിമാരായ കെ.കെ. ശൈലജ, കടന്നപ്പള്ളി രാമചന്ദ്രന് എന്നിവര് മുഖ്യാതിഥികളായിരിക്കും. കിയാല് എംഡി തുളസീദാസ്, ബാലകിരണ്, സന്തോഷ് കോശി, ദിനേശ് ഭാസ്കര് എന്നിവര് വിവിധ വിഷയങ്ങളില് പ്രബന്ധം അവതരിപ്പിക്കും. തുടര്ന്ന് വിവിധ കലാപരിപാടികളും അരങ്ങേറും.
പത്തിന് അബുദാബിയില് എത്തുന്ന യാത്രാസംഘത്തിന് വിമാനത്താവളത്തില് സ്വീകരണം നല്കും. തുടര്ന്ന് വൈകുന്നേരം ആറു മുതല് ദുബായ് ദേര ക്രൗണ് പ്ലാസയില് നടക്കുന്ന സെമിനാറില് കിയാല് പ്രതിനിധി, കിയാല് കണ്സള്ട്ടന്റ് കെപിഎംജിയുടെ പ്രതിനിധി, പ്രവാസിപ്രമുഖര് തുടങ്ങിയവര് പങ്കെടുക്കും.
കണ്ണൂര് പ്രസ് ക്ലബിന്റെയും ദിശ, കേരള ചേംബര് ഓഫ് കൊമേഴ്സ് ആന്ഡ് ഇന്ഡസ്ട്രീസ്, വെയ്ക്ക്, വോക്ക്, പോസിറ്റീവ് കമ്യൂണ് തുടങ്ങിയ സംഘടനകളുടെയും പങ്കാളിത്തത്തോടെയാണ് പരിപാടി സംഘടിപ്പിക്കുന്നത്. അക്ബര് ട്രാവല്സ്, അല് ഹിന്ദ് ട്രാവല്സ്, സഫീറ ട്രാവല്സ്, ഫ്ലൈവിംഗ് ട്രാവല്സ്, കാലിക്കട്ട് ടൂര്സ് ആന്ഡ് ട്രാവല്സ്, ഫൈന് ട്രാവല്സ് തുടങ്ങിയ സ്ഥാപനങ്ങളും യാത്രയില് മുഖ്യപങ്ക് വഹിക്കുന്നുണ്ട്.
പത്രസമ്മേളനത്തില് ചെയര്മാന് സി. ജയചന്ദ്രന്, ജനറല് കണ്വീനര് ടി.വി. മധുകുമാര്, കോ-ഓര്ഡിനേറ്റര് റഷീദ് കുഞ്ഞി പാറാല്, വെയ്ക്ക് ദുബായ് പ്രസിഡന്റ് അബ്ദുള് ഖാദര് പനക്കാട്ട്, പ്രസ്ക്ലബ് സെക്രട്ടറി പ്രശാന്ത് പുത്തലത്ത് എന്നിവര് പങ്കെടുത്തു
0 Comments