തൃശൂര്: സ്വരാജ് റൗണ്ടിനെ ചുവന്നുതുടുപ്പിച്ച് നഗരത്തില് പതിനായിരത്തോളം ക്രിസ്മസ് പാപ്പാമാരുടെ 'സാന്താപ്പൂരം'. ചുവന്ന തൊപ്പിയും ഉടുപ്പും ധരിച്ച് 'ജിംഗിള് ബെല്' താളത്തിനൊത്തു ചുവടുെവച്ച് പാപ്പാമാര് നഗരവീഥിയില് നിറഞ്ഞൊഴുകി. ക്രിസ്മസിനോടനുബന്ധിച്ച് തൃശൂര് പൗരാവലിയും അതിരൂപതയും സംയുക്തമായി സംഘടിപ്പിച്ച ബോണ് നതാലെ കരോള് ഘോഷയാത്ര കാണാന് ആയിരങ്ങളാണ് എത്തിയത്.
ചുവപ്പും വെളുപ്പും വേഷമണിഞ്ഞ രണ്ടായിരത്തോളം കുട്ടികള് ഘോഷയാത്രയുടെ മുന്നിരയില് പാട്ടിനൊത്ത് ചുവടുവെച്ചു. റോളര് സ്കേറ്റിങ്ങിലൂടെ അവര് ഒഴുകിപ്പടര്ന്നത് കൗതുകക്കാഴ്ചയായി. 2500ഓളം ഫാന്സി ഡ്രസ് വേഷധാരികളും നിരന്നു.
ഇവര്ക്കു പിറകില് കൂര്ത്ത തൊപ്പിയും വെളുത്ത താടിയുമായി സാന്താക്ലോസുമാര് എത്തി. പൊയ്ക്കാലിലും വീല്ചെയറിലുമെല്ലാം അവര് റോഡുനിറഞ്ഞു. പാപ്പാവേഷമിട്ട് ബൈക്കുകളിലെത്തിയ യുവാക്കളും ഫ്ലാഷ്മോബും ഘോഷയാത്രക്ക് ഹരം പകര്ന്നു.
2013 മുതല് നടത്തുന്ന ബോണ് നതാലെ 2014ലാണ് ഗിന്നസ് ബുക്കില് ഇടം പിടിച്ച് ലോകശ്രദ്ധയാകര്ഷിച്ചത്. 'മെറി ക്രിസ്മസ്' എന്നതിെന്റ ഇറ്റാലിയന് പദമാണ് 'ബോണ് നതാലെ'. ലോകത്ത് തന്നെ ഇത്ര ക്രിസ്മസ് പാപ്പാമാര് പങ്കെടുക്കുന്ന മറ്റൊരു ആഘോഷമില്ല എന്നതാണ് ഇതിെന്റ പ്രത്യേകത.
0 Comments